Gëzim Mekuli,
(Njohës i mediave dhe retorikës)

Në një kohë kur informacioni qarkullon me shpejtësi marramendëse dhe opinioni publik ndikohet lehtësisht nga titujt dhe tregimet e mediave, leximi i gazetave të ndryshme është bërë më i rëndësishëm se kurrë.

Një nga gabimet më të mëdha që bëjnë shumë njerëz sot është kufizimi i burimeve të tyre të informacionit vetëm tek ato që përputhen me bindjet e tyre politike. Ky është një problem i madh për demokracinë dhe për një shoqëri të informuar siç duhet.

Liria e shtypit dhe objektiviteti

Një redaksi e pavarur, siq është MekuliPress, duhet të jetë e lirë nga ndërhyrjet politike të drejtpërdrejta, por kjo nuk do të thotë që ajo nuk mund të ketë një këndvështrim të caktuar mbi çështjet shoqërore, kombëtare dhe politike. Në fakt, çdo media ka një qasje të veçantë, e cila pasqyrohet në mënyrën se si raportohen lajmet, cilat tema marrin përparësi dhe si interpretohen ngjarjet. Kjo nuk duhet të kuptohet si “fake media”, por si një pjesë e natyrshme e lirisë së shtypit.

Megjithatë, sfida qëndron tek lexuesi: ai duhet të mësojë të analizojë burimet dhe të dallojë faktet nga opinionet.

Nuk është e mençur të besosh verbërisht një gazetë dhe të refuzosh një tjetër, vetëm sepse ajo përfaqëson një qëndrim të ndryshëm. Pikërisht këtu qëndron rëndësia e leximit të shumë burimeve.

Nevoja për perspektiva të ndryshme

Nëse një qytetar informohet vetëm nga burime që mbështesin pikëpamjet e tij, ai rrezikon të krijojë një realitet të njëanshëm, i cili nuk pasqyron të vërtetën e plotë. Leximi i gazetave nga të gjitha spektrat politike na ndihmon të kuptojmë më mirë argumentet e ndryshme, të sfidojmë bindjet tona dhe të zhvillojmë një mendim më kritik.

Një shoqëri demokratike funksionon më mirë kur qytetarët e saj janë të informuar në mënyrë të gjerë dhe të balancuar. Vetëm duke i ekspozuar veten ndaj ideve të ndryshme mund të formojmë një mendim të pavarur dhe të marrim vendime më të drejta.

Lexues të nderuar,
Në fund të fundit, mediat nuk janë të ndara në “të vërteta” dhe “të rreme”, por pasqyrojnë këndvështrime të ndryshme mbi botën. Për të qenë një shqiptar i mirëinformuar, është e nevojshme të lexojmë jo vetëm gazetat që përputhen me bindjet tona, por edhe ato që i sfidojnë ato. Kjo jo vetëm që forcon demokracinë, por na bën më të mençur dhe më të vetëdijshëm për botën përreth nesh.