Ministrja e Jashtme e Gjermanisë, Annalena Baerbock, ka thënë se Serbia duhet të bëjë thirrje për heqje dorë nga dhuna.

Teksa është deklaruar rreth sulmit ndaj Policisë së Kosovës në Banjskë ku u vra një zyrtar policor, Baerbock ka thënë se në situatën e tensionuar në Ballkanin Perëndimor, përgjegjësia matet me atë se çfarë palët bëjnë për depërshkallëzim.

“Pas sulmit ndaj policisë në Kosovë, të gjithë duhet të jenë të vetëdijshëm për rolin e tyre për paqe. Në situatën e tensionuar në Ballkanin Perëndimor, përgjegjësia matet me atë që bëni për të de-përshkallëzuar. Serbia në veçanti duhet të bëjë thirrje pa mëdyshje për heqjen dorë nga dhuna”, ka shkruar ajo në platformën X, të njohur më parë si Twitter.

Lexo më shumë “Heroi im, babi im, jemi krenar me ty dhe heroizmin tënd” – vajza e policit të ndjerë me fjalë prekëse për babin e saj
Të dielën, si pasojë e një sulmi të armatosur në Banjskë të Zveçanit u vra polici Afrim Bunjaku. Në aksionin e Policisë, dhjetëra sulmues të armatosur e uniformuar serbë u rrethuan në fshatin Banjskë. Policia u sulmua në vazhdimësi nga sulmuesit. Nga aksioni deri tash janë konfirmuar tre sulmues të vrarë e tetë të arrestuar. Është kapur edhe arsenal armësh, ndërsa disa sulmues të tjerë tashmë është thënë se kanë ikur e po trajtohen në spitalet e Serbisë.