Një propozim për ndalim të prekjes së telefonit celular gjatë drejtimit të automjetit është dërguar për konsultim nga Ministria e Transportit në Norvegji, shkruan gazeta norvegjeze Dagsavisen,

Policia Rrugore e mbështet ndalimin.

Sipas TV 2, propozimi nënkupton që mund të ndalohet edhe vetëm prekja e telefonit nëse ai nuk është i montuar në mënyrë fikse.

– “Duke ndaluar mbajtjen e telefonit në dorë, do të përcillet një pritshmëri e qartë dhe e padiskutueshme për sjelljen e publikut, gjë që gjithashtu do ta bëjë më të lehtë për policinë të reagojë ndaj përdorimit të paligjshëm të telefonit celular,” thuhet në propozimin që aktualisht është në fazën e konsultimeve nga Ministria e Transportit, shkruan MekuliPress.

Policia Rrugore mbështet propozimin për ndalim të plotë, dhe shprehet se kjo do ta bëjë më të lehtë zbatimin e rregullave krahasuar me ato të tanishmet.

– “Mospërqendrimi ka një ndikim të madh në sigurinë rrugore. Hulumtimet tregojnë se përdorimi i paligjshëm i telefonit celular është shkak i drejtpërdrejtë i katër për qind të aksidenteve fatale,” thotë zëvendës-shefi i Policisë Rrugore, Roar S. Larsen, për TV 2.

Gjobat për përdorim të telefonit gjatë drejtimit të automjetit janë aktualisht 10.450 korona norvegjeze (990 euro). Vitin e kaluar, 5.843 shoferë janë gjobitur për këtë arsye.

Megjithatë, komisioni propozon që të lejohet kontrolli i muzikës nga telefoni, dhe shkruan se mund të jetë e pranueshme të lejohen “disa shtypje butonash” për këtë qëllim.