– Ky është momenti i Evropës. Ne jemi gati të rrisim përpjekjet tona, deklaroi presidentja e Komisionit Evropian, Ursula von der Leyen.

BE-ja planifikon të fuqizojë mbrojtjen me një buxhet prej afro 800 miliardë euro, citon MekuliPress agjensinë e lajmeve Reuters.

Von der Leyen prezantoi të martën pesë pika kyçe për të rritur investimet në mbrojtjen evropiane:

Nxitja e rritjes së shpenzimeve kombëtare për mbrojtjen duke lehtësuar rregullat buxhetore të BE-së
Sigurimi i 150 miliardë eurove në kredi për shtetet anëtare
Përdorimi i një pjese më të madhe të buxheteve të BE-së për mbrojtjen
Lirimi i kapitalit privat për industrinë e mbrojtjes
Lejimi i Bankës Evropiane të Investimeve (EIB) për të dhënë kredi për mbrojtjen

– BE-ja do të përdorë të gjitha mundësitë financiare për të rritur investimet në mbrojtje, theksoi Von der Leyen.

Koment i MekuliPress: Thirrje për Kosovën dhe Shqipërinë, koha për një strategji të përbashkët ushtarake

Në një kohë kur BE-ja po mobilizohet për të forcuar mbrojtjen e saj, Kosova dhe Shqipëria nuk mund të mbeten duarkryq. Sfida gjeopolitike dhe kërcënimet e mundshme kërkojnë që të dy shtetet shqiptare të rrisin buxhetin ushtarak, të forcojnë industrinë e mbrojtjes dhe të zhvillojnë strategji afatgjata për sigurinë kombëtare.

Në këtë kuadër, bashkëpunimi me Kroacinë dhe Maqedoninë e Veriut është vendimtar. Këto vende ndajnë interesa të përbashkëta strategjike dhe mund të krijojnë një bosht të fuqishëm mbrojtës në Ballkanin Perëndimor, duke bashkërenduar investimet në mbrojtje dhe duke ndërtuar një aleancë më të fortë ushtarake brenda NATO-s dhe BE-së.

Historia na mëson se siguria kombëtare nuk mund të lihet në duart e të tjerëve. Prandaj, Tirana dhe Prishtina duhet të veprojnë tani, të rrisin kapacitetet ushtarake dhe të pozicionohen si aktorë seriozë në arkitekturën e mbrojtjes evropiane.